மட்டக்களப்பு மாவட்ட முன்னாள் பாராளுமன்ற உறுப்பினரும், மட்டக்களப்பு மாநகர சபையின் முதலாவது முதல்வருமான அமரர் செல்லையா இராஜதுரை அவர்களின் இரங்கல் அஞ்சலி நிகழ்வு, மட்டக்களப்பு மாநகர சபையின் ஏற்பாட்டில் நேற்று 27.07.2026 மாநகர சபை நகர மண்டபத்தில் நடைபெற்றது.
இந் நிகழ்வில், இலங்கைத் தமிழ் அரசுக் கட்சியின் மட்டக்களப்பு மாவட்ட பாராளுமன்ற உறுப்பினர் வைத்தியர் இ.சிறிநாத் கலந்து கொண்டு அஞ்சலி செலுத்தினார்.
இதன் போது அமரர் செல்லையா இராஜதுரை அவர்களின் உருவப்படத்திற்குச் சுடரேற்றி, மலர்மாலை அணிவிக்கப்பட்டு மலர் தூவி அஞ்சலி செலுத்தப்பட்டு மௌன அஞ்சலி அனுஷ்டிக்கப்பட்டது.
தொடர்ந்து வருகை தந்த அதிதிகளால் அமரர் செல்லையா இராஜதுரை அவர்களின் அரசியல் மற்றும் சமூகப் பணிகளை நினைவுகூர்ந்து நினைவுரைகள் நிகழ்த்தப்பட்டன.
இந் நிகழ்வில் இலங்கைத் தமிழ் அரசுக் கட்சியின் மட்டக்களப்பு மாவட்ட பாராளுமன்ற உறுப்பினர் ஞா.சிறிநேசன், மட்டக்களப்பு மாநகர சபை முதல்வர் சிவம் பாக்கியநாதன், பிரதி முதல்வர், மாநகர சபை உறுப்பினர்கள், மாநகர சபை ஆணையாளர் நாகராஜா தனஞ்ஜெயன் உத்தியோகத்தர்கள், பணியாளர்கள், செல்லையா இராஜதுரை அவர்களின் குடும்ப உறுப்பினர்கள், உறவினர்கள், சமூக ஆர்வலர்கள் மற்றும் பொதுமக்கள் எனப் பலர் கலந்துகொண்டனர்.
