மாண்புமிகு அவைத்தலைவர் அவர்களே, இன்று நாடாளு மன்றத்தில் முன்வைக்கப்பட்டு உள்ள நான்கு சட்டவாக்கப் பொருண்மைகளுக்கு ஒப்புதல் அளிப்பது தொடர்பான எனது கருத்துகளை இந்த அவையில் எடுத்துரைக்க விழைகின்றேன்.
இன்று நம் முன் வைக்கப்பட்டு உள்ள சட்டக் பொருண்மைகள்; பொருண்மிய நிலைத் தன்மையின் இரண்டு முதன்மையான தூண்களைக் கையாள்கின்றன:
ஒன்று; இலங்கையின் எல்லைகளைத் தாண்டிய மூலதன நகர்வுகளை மேலாண்மை செய்தல். இரண்டு; இலங்கை நாடானது எவ்வாறு பொதுக் கடனைப் பெறுகிறது, பதிவு செய்கிறது மற்றும் சேவை செய்கிறது என்பதை நிருவகித்தல்.
மாண்புமிகு அவைத்தலைவர் அவர்களே, முதலில் 2493/36 மற்றும் 2493/37 ஆம் எண் கொண்ட அரசிதழ்களில் வெளியிடப்பட்ட, 2017 ஆம் ஆண்டின் 12 ஆம் எண் கொண்ட வெளிநாட்டு நாணயமாற்றுச் சட்டத்தின் 7 ஆம் பிரிவோடு சேர்த்து வாசிக்கப்படும் இரண்டு ஒழுங்குவிதிகள் குறித்துப் பேச விரும்புகின்றேன்.
முதலாவதாக ; 2026 ஆம் ஆண்டின் 1 ஆம் எண் கொண்ட ஒழுங்குவிதியானது இலங்கையில் வசிப்போர் வெளிநாடுகளில் மேற்கொள்ளும் முதலீடுகளுக்கான பங்கு வருவாய் மற்றும் மூலதன வருவாய் என்பவற்றை ஈட்டிய 180 நாட்களுக்குள் இலங்கை வெளிநாட்டு நாணயக் கணக்குகளுக்குத் திரும்ப அனுப்பப்பட வேண்டும் எனக் கட்டுப் படுத்துகின்றது.
இதன்மூலம், வெளிச்செல்லும் மூலதனப் பாய்ச்சல் இலங்கையின் உள்நாட்டு வங்கி முறைக்கு ஆதரவளிப்பதையும் தேசிய இருப்புக்களை வலுப்படுத்துவதையும் உறுதி செய்கின்றது.
2026 ஆம் ஆண்டின் 2 ஆம் எண் கொண்ட ஒழுங்குவிதியானது; வெளிநாடுகளில் வாழும் இலங்கையரது வெளிநாட்டுப் பணப் பரிமாற்றங்களைக் கையாள்கின்றது.
வெளிநாடுகளில் வாழும் இலங்கையர், சட்ட அடிப்படையில் ஈட்டிய உள்நாட்டுச் சொத்துக்களைப் பரிமாற்றம் செய்ய முயலும்பொழுது,சிக்கலான நிருவாகக் கொள்கைகள், தன்னிச்சையான முடக்கம் மற்றும் அடிக்கடி மாறும் விதிகளை எதிர்கொண்டனர்.
இது; இலங்கை வங்கி அமைப்பின் மீதான அவர்களது நம்பிக்கையைச் சிதைத்து, முறைசாராப் பணப்பரிமாற்ற வலைப்பின்னல்களைப் பயன்படுத்தத் தூண்டியது.
2026 ஆம் ஆண்டின் 2 ஆம் எண் கொண்ட ஒழுங்குவிதியானது, நியாயமான, வெளிப்படையான மற்றும் விதிகள் சார்ந்த ஓர் அமைப்பை உருவாக்குகிறது.
இந்த அமைப்பானது; திடீர் பணப்புழக்க அதிர்ச்சிகளிலிருந்து இலங்கையின் வெளிநாட்டு நாணய இருப்புகளைப் பாதுகாக்கும் அதே வேளையில், வெளிநாடுகளில் வாழும் இலங்கையரது சட்ட அடிப்படையிலான உரிமைகளையும் மதிக்கிறது.
மாண்புமிகு அவைத்தலைவர் அவர்களே, இந்த ஒழுங்கு விதிகளோடு, 2493/38 ஆம் எண் கொண்ட அரசிதழில் வெளியிடப்பட்ட வெளிநாட்டு நாணயமாற்றுச் சட்டத்தின் 22 ஆம் பிரிவின் கீழ் பிறப்பிக்கப்பட்ட கட்டளையையும் நாம் பரிசீலிக்கிறோம். பிரிவு 22 ஆனது ஒரு தேவையான பெருநோக்கு நிதிப் பாதுகாப்பு ஒழுங்குமுறை அமைப்பாகச் செயற்படுகிறது.
இது,வெளிநாட்டு நாணயமாற்றுச் சிக்கல் நிலவும் காலங்களில், நடப்புக் கணக்குப் பரிவர்த்தனை, வர்த்தகத் தீர்வு மற்றும் அந்நிய நேரடி முதலீட்டு வருவாய்ப் பரிமாற்றங்களைப் பாதுகாக்கும் அதே வேளையில், தேவையற்ற மூலதன வெளியேற்றங்களைக் கட்டுப்படுத்த நிதி அமைச்சருக்குத் தற்காலிகப் பாதுகாப்பு அதிகாரத்தை வழங்குகிறது.
மாண்புமிகு அவைத்தலைவர் அவர்களே, அடுத்ததாக நான் இன்றைய ஒழுங்குப் பத்திரத்தின் விவர எண் *1 ஐ நோக்கி எனது கவனத்தைத் திருப்புகிறேன்: இது 2024 ஆம் ஆண்டின் 33 ஆம் எண் கொண்ட அரசுக்கடன் மேலாண்மைச் சட்டத்தின் 16 ஆம் பிரிவின் கீழான சட்ட அடிப்படையிலான தீர்மானமாகும்.
அரசுக்கடன் மேலாண்மைச் சட்டத்தை நிறைவேற்றியது இலங்கையின் பொது நிதி வரலாற்றில் ஒரு முதன்மையானமான கட்டமைப்புச் சீர்திருத்தமாகும்.
பல பதிற்றாண்டுகளாக, 1937 ஆம் ஆண்டின் பதிவுசெய்யப்பட்ட பங்குகள் மற்றும் பிணையங்கள் கட்டளைச் சட்டம், உள்ளூர் திறைசேரி உண்டியல்கள் கட்டளைச் சட்டம் முதலியவற்றின் கீழ்; பொதுக் கடன் மேலாண்மை செய்யப்பட்டு வந்தது.
அரசுக்கடன் மேலாண்மைச் சட்டமானது; நிதி அமைச்சின் கீழ் இயங்கும் சுதந்திரமான அரசுக்கடன் மேலாண்மை அலுவலகத்திற்குள் (PDMO) கடன் மேலாண்மையை நடுவப் படுத்துவதன் மூலம் இந்த முரண்பாட்டைத் தீர்த்தது.
இன்று நம்முன் உள்ள தீர்மானம் ஆனது, 2026 ஆம் ஆண்டுக்கான மொத்தக் கடன் வாங்கும் வரம்புக்கு ஒப்புதல் அளிப்பதன் மூலமும் ஆண்டுக்கான கடன் வாங்கல் திட்டத்தை (Annual Borrowing Plan) நிறுவுவதன் மூலமும் சட்டத்தின் பிரிவு 16 ஐ நடைமுறைப்படுத்துகிறது.
மாண்புமிகு அவைத்தலைவர் அவர்களே, இந்தத் தீர்மானம் ஆனது;அனைத்து அரசாங்கக் கடன் வாங்கல்களையும் அமைச்சரவையால் ஒப்புதல் அளிக்கப்பட்ட நடுத்தரக் காலக் கடன் வழிமுறையோடு (Medium-Term Debt Strategy) நேரடியாக இணைக்கிறது.
இந்தப் 16 ஆம் பிரிவின் கீழ், நாடாளுமன்ற முன் ஒப்புதல் இன்றி எந்தவோர் அரசும் கடன் வாங்கவோ, உத்தரவாதங்களை வெளியிடவோ அல்லது கடன் கொடுக்கல் வாங்கல்களை மேற்கொள்ளவோ முடியாது.
இது தேசிய பாதீட்டின் மீதான சட்டவாக்க அதிகாரத்தை மீளமைப்பதோடு, பொதுக் கடன் வாங்குதல்; கடன் நிலைத்தன்மை அளவுகோலுக்குள் இருப்பதையும் உறுதி செய்கிறது.
இருப்பினும், மாண்புமிகு அவைத்தலைவர் அவர்களே, ஒரு தொலைநோக்குப் பார்வையுள்ள நாடாளுமன்றம் என்ற வகையில் இந்த நடவடிக்கைகளைத் திறனாய்வு அடிப்படையில் ஆராய வேண்டும்.
சந்தைப் பங்கேற்பாளர்கள், வணிகத் தலைவர்கள் மற்றும் பொதுமக்களால் எழுப்பப்படும் நடைமுறை கவலைகளை நாம் கவனத்தில்கொள்ள வேண்டும்.
முதலாவதாக;அரச படுகடன் முகாமைத்துவச் சட்டத் (PDMA) தீர்மானம் 2026 ஆம் ஆண்டுக்கான மொத்த நிதித் தேவையாக 6,840 பில்லியன் ரூபாயை ஏற்றுக் கொள்கின்றது.
உள்நாட்டுச் சந்தைக்குள் இந்த அளவு கடன் வாங்கும் அளவை ஈர்ப்பது, சிறு மற்றும் நடுத்தர நிறுவனங்களுக்கான (SMEs) கடன் வாய்ப்புகளை முடக்கலாம்.
அரசு கடன் வாங்குவது; வணிக வங்கிப் பணப்புழக்கத்தை உறிஞ்சினால், தனியார் துறை சார்ந்த பொருண்மிய மீட்பை நம்மால் அடைய முடியாது.
இரண்டாவதாக; 2 ஆம் எண் கொண்ட ஒழுங்குவிதியின் கீழ் வெளிநாடுகளில் வாழும் இலங்கையரது மூலதனப் பரிமாற்றங்கள் தொடர்பான அவர்களது வெறுப்பை நீக்க வேண்டும்.
மூன்றாவதாக; பொதுக் கடன் நிருவாகத்தைப் பொறுத்தவரை, அரசுக்கடன் மேலாண்மை அலுவலகத்தை நிதி அமைச்சிற்குள் அமைப்பது அரசியல் செல்வாக்கு செலுத்தும் என்ற அச்சத்தை உருவாக்குகிறது.
மாண்புமிகு அவைத்தலைவர் அவர்களே, இந்த அறை கூவல்களைக் கண்டறிவது, நாம் நடைமுறைச் சாத்தியமான தீர்வுகளை முன்வைக்க வேண்டியதை தேவை ஆக்குகின்றது.
முதலாவதாக, தனியார் துறை கடன் வாய்ப்புகள் முடக்கப் படுவதைத் தடுக்க, அரச படுகடன் முகாமைத்துவச் சட்டத்தின் கீழ் ஒப்புதல் அளிக்கப் பட்டுள்ளபடி, அரசுக்கடன் மேலாண்மை அலுவலகமானது மேலாண்மை நடவடிக்கைகளைக் கடுமையாகப் பின்பற்ற வேண்டும்.
இரண்டாவதாக, வெளிநாட்டு நாணயமாற்று நிருவாகத்தைச் சீரமைக்க, வணிக வங்கிகள், உள்நாட்டு இறைவரித் திணைக்களம் மற்றும் பதிவாளர் நாயகத் திணைக்களம் ஆகியவற்றை இணைக்கும் ஒருங்கிணைந்த எண்மிய சரிபார்ப்பு இணையத் தளத்தை அரசு உருவாக்க வேண்டும்.
மூன்றாவதாக, பொதுக் கடன் நடவடிக்கைகளின் சுதந்திரத்தை உறுதி செய்யும் பொருட்டாக, கடன் வாங்கும் திட்டங்களைக் மேற்பார்வையிட ஒரு சுதந்திரமான தொழில்நுட்ப அறிவுரைக் குழுவை நிறுவ வேண்டும்.
மாண்புமிகு அவைத்தலைவர் அவர்களே, இறுதியாக, வெளிநாட்டு நாணயமாற்றுச் சட்டத்தின் கீழான பிரிவு 22 இன் கட்டளைகள், மாறும் தன்மையுடைய, புறநிலை அளவு கோல்களை நோக்கி நகர வேண்டும் .
தெளிவான பொருளாதாரத் தூண்டுதல்கள் பன்னாட்டு முதலீட்டாளர்களுக்கு உறுதியை அளிப்பதோடு, இலங்கை நிலையான திறந்த நிதித் தன்மைக்கு உறுதிபூண்டுள்ளது என்பதையும் வெளிப்படுத்துகின்றன.
மாண்புமிகு அவைத்தலைவர் அவர்களே, இன்று நம் முன் உள்ள இந்தச் சட்டவாக்க சீர்திருத்தங்கள் பொருண்மிய நிலைத் தன்மைக்கான கட்டமைப்புச் சட்டகத்தை வழங்குகின்றன.
இருப்பினும், அவற்றின் இறுதி வெற்றி திறமையான செயல்படுத்தல், நிருவாக வெளிப்படைத்தன்மை மற்றும் நிறுவனப் பொறுப்புக்கூறல் ஆகியவற்றிலேயே தங்கியுள்ளது எனக் கூறி எனது உரையை நிறைவு செய்கின்றேன்.நன்றி.
