‘பாவி’ (Bavi) என்று அழைக்கப்படும் சக்திவாய்ந்த சூறாவளி (பிலிப்பைன்ஸில் ‘இந்தே’ என அறியப்படுகிறது) காரணமாக பிலிப்பைன்ஸ் நாட்டில் ஏற்பட்டுள்ள பயங்கர மண்சரிவுகளில் சிக்கி 15 பேர் பரிதாபமாக உயிரிழந்துள்ளதாக வெளிநாட்டு ஊடகங்கள் செய்தி வெளியிட்டுள்ளன.
இந்தச் சூறாவளியானது பிலிப்பைன்ஸ் நாட்டின் மீது நேரடியாகக் கரையைக் கடக்கவில்லை என்ற போதிலும், அதன் வெளிப்புறத் தாக்கத்தினால் அங்கு கொட்டித் தீர்க்கும் அதிபயங்கர கனமழை காரணமாகவே இந்த மோசமான மண்சரிவுகள் ஏற்பட்டுள்ளன. பிலிப்பைன்ஸின் மலபதான் (Malapatan) பகுதியில் ஏற்பட்ட மண்சரிவில் 10 பேரும், லானாவோ டெல் சுர் (Lanao del Sur) மாகாணத்தில் ஏற்பட்ட மண்சரிவில் 5 பேரும் உயிரிழந்துள்ளதாக முதற்கட்டத் தகவல்கள் தெரிவிக்கின்றன.
இதேவேளை, இந்தச் சூறாவளியின் தொடர் தாக்கத்தினால் தலைநகர் மணிலா உட்பட நாட்டின் பல பகுதிகளில் மேலும் கனமழை பெய்வதற்கும், கடுமையான வெள்ளப்பெருக்கு ஏற்படுவதற்கும் அதிக அபாயம் இருப்பதாக பிலிப்பைன்ஸ் வானிலை ஆய்வு மையம் (PAGASA) அவசர எச்சரிக்கை விடுத்துள்ளது.
தற்போது இந்தச் சூறாவளியானது தைவான், ஜப்பான் மற்றும் சீனா ஆகிய நாடுகளை நோக்கி நகர்ந்து வருகின்றமையினால், அந்தந்த நாடுகளிலும் முன்னெச்சரிக்கை நடவடிக்கைகளும், பொதுமக்களைப் பாதுகாப்பான இடங்களுக்கு வெளியேற்றும் பணிகளும் தீவிரமாக முன்னெடுக்கப்பட்டு வருகின்றன.
முன்னதாக, இந்தச் சூறாவளியானது குவாம் (Guam) மற்றும் வடக்கு மரியானா (Northern Mariana) தீவுகளைத் தாக்கிப் பெரும் சேதத்தை ஏற்படுத்தியிருந்தமை குறிப்பிடத்தக்கது.
