மத்திய மாகாண ஆளுநர் பேராசிரியர் சரத் அபேகோன் தனது பதவியிலிருந்து விலகத் தீர்மானித்துள்ளதாகத் தகவல்கள் வெளியாகியுள்ளன. அவர் தனது பதவி விலகல் கடிதத்தை ஜனாதிபதி அநுரகுமார திசாநாயக்கவுக்கு அனுப்பி வைத்துள்ளார்.
நேற்று (செவ்வாய்க்கிழமை) அனுப்பப்பட்ட இந்த பதவி விலகல் கடிதத்திற்கு ஜனாதிபதி செயலகத்திடமிருந்து இதுவரை எந்தப் பதிலும் கிடைக்கவில்லை எனத் தெரிவிக்கப்படுகிறது. ஜனாதிபதி இக்கடிதத்தை ஏற்றுக்கொள்வாரா அல்லது நிராகரிப்பாரா என்பது குறித்த இறுதித் தீர்மானம் இதுவரை அறிவிக்கப்படவில்லை என ஆளுநர் சரத் அபேகோன் குறிப்பிட்டுள்ளார்.
தனது இந்த பதவி விலகல் முடிவானது முற்றிலும் தனிப்பட்ட காரணங்களுக்காக எடுக்கப்பட்ட ஒன்று என்றும் அவர் தெளிவுபடுத்தியுள்ளார். ஆளுநராகப் பொறுப்பேற்பதற்கு முன்னர், இவர் பேராதனைப் பல்கலைக்கழகத்தின் துணைவேந்தராகவும் கடமையாற்றியுள்ளார் என்பது குறிப்பிடத்தக்கது.
செயலாளர் பதவியும் வெற்றிடம்: இதேவேளை, மத்திய மாகாண ஆளுநரின் செயலாளர் பதவியும் தற்போது வெற்றிடமாகியுள்ளது. இப்பொறுப்பை வகித்த மஞ்சுளா மதஹபொல அண்மையில் ஓய்வு பெற்றதைத் தொடர்ந்து, மத்திய மாகாண அரச சேவை ஆணைக்குழுவின் செயலாளர் இஷான் விஜேதிலக தற்போது இடைக்கால செயலாளராக நியமிக்கப்பட்டு கடமையாற்றி வருகின்றார்.
