கிழக்கு மாகாணத்தின் போக்குவரத்துத் துறையை நவீனமயமாக்கும் மற்றுமொரு முக்கிய உட்கட்டமைப்பு மேம்பாட்டுத் திட்டமாக, வீச்சுகல்முனை வீதி தொடக்கம் வலையரவு பாலம் வரையான வீதியை இரட்டை வழிப் பாதையாக (Dual Carriageway) தரம் உயர்த்துவதற்கான பணிகள் ஆரம்பிக்கப்படவுள்ளன.
பிராந்தியத்தில் நாளுக்கு நாள் அதிகரித்து வரும் போக்குவரத்து நெரிசலுக்குத் நிலையான தீர்வை வழங்குவதற்கும், பொதுமக்களின் பயண நேரத்தைக் குறைப்பதற்கும் இந்த வீதி அபிவிருத்தித் திட்டம் முன்னெடுக்கப்பட்டுள்ளது.
சுமார் 1280 மீட்டர் (1.28 கிலோமீட்டர்) நீளத்தைக் கொண்ட இந்த வீதிப் பகுதி, முழுமையாக அகலப்படுத்தப்பட்டு இரட்டை வழிச் சாலையாக மாற்றப்படவுள்ளது. அத்துடன் நவீன தரத்திலான காப்பட் (Carpeted/Asphalt) இட்டு இப்பகுதி புனரமைக்கப்படவுள்ளமை குறிப்பிடத்தக்கது.
இப்பாரிய உட்கட்டமைப்பு மேம்பாட்டுத் திட்டத்திற்காக கிழக்கு மாகாண சபையினால் 45 மில்லியன் ரூபாய் நிதி ஒதுக்கப்பட்டுள்ளது. இந்த நிதி ஒதுக்கீட்டின் கீழ், வீதி விரிவாக்கப் பணிகளுடன் தகுந்த பாதுகாப்பு அம்சங்களும் உள்ளடக்கப்பட்டு இவ்வீதி நவீன முறையில் வடிவமைக்கப்படவுள்ளது.
இந்த வீதி அபிவிருத்திப் பணிகள் நிறைவடையும் போது, வீச்சுகல்முனை மற்றும் வலையரவுப் பகுதிகளுக்கு இடையிலான போக்குவரத்து நெரிசல்கள் முற்றாகக் குறைந்து பயணங்கள் இலகுவடைவதுடன், இப்பகுதியின் பொருளாதார மற்றும் வர்த்தக நடவடிக்கைகளும் பெருமளவில் வளர்ச்சியடையும் என எதிர்பார்க்கப்படுகிறது.
பொதுமக்கள் விபத்துகளின்றிப் பாதுகாப்பான முறையிலும், சுமுகமாகவும் பயணிப்பதை உறுதிசெய்ய இந்த நவீனமயமாக்கல் திட்டம் வழிவகுக்கும் என அதிகாரிகள் நம்பிக்கை வெளியிட்டுள்ளனர்.
