பாரசீக வளைகுடாவில் அமைந்துள்ள ஈரானின் முக்கிய மூலோபாய தீவான ‘கெஷ்ம்’ (Qeshm) மீது அமெரிக்க இராணுவம் ஏவுகணைத் தாக்குதல் நடத்தியுள்ளதாக ஈரானிய ஊடகங்கள் செய்தி வெளியிட்டுள்ளன. இச்சம்பவம் மத்திய கிழக்கு பிராந்தியத்தில் ஏற்கனவே நிலவி வரும் பாதுகாப்புப் பதற்றத்தை மேலும் தீவிரமடையச் செய்துள்ளது.
ஈரானிய இஸ்லாமிய புரட்சிகர காவல்படையுடன் (IRGC) தொடர்புடைய ‘தஸ்னிம்’ (Tasnim) செய்தி நிறுவனம் வெளியிட்டுள்ள தகவலின்படி, ஞாயிற்றுக்கிழமை அமெரிக்கப் படையினரால் ஏவப்பட்ட ஏவுகணையொன்று கெஷ்ம் தீவில் வந்து விழுந்துள்ளதாகத் தெரிவிக்கப்பட்டுள்ளது.
முன்னதாக, இத்தீவின் பல்வேறு பகுதிகளில் நான்கு பயங்கர வெடிப்புச் சத்தங்கள் கேட்டதாக ஈரானின் அரச செய்தி நிறுவனமான IRNA உறுதிப்படுத்தியிருந்தது. எனினும், இந்தத் தாக்குதல் சம்பவத்தில் இதுவரை எந்தவொரு உயிரிழப்பும் பதிவாகவில்லை எனத் தெரிவிக்கப்படுகின்றது.
இதேவேளை, பந்தர் அப்பாஸ் மற்றும் சிரிக் ஆகிய கடலோரப் பகுதிகளில் கேட்ட ஏனைய வெடிப்புச் சத்தங்கள் வெளிநாட்டு இராணுவத் தாக்குதல்களால் ஏற்பட்டவை அல்ல என்றும், அவை ஈரானியப் படைகளின் வழக்கமான பாதுகாப்பு நடவடிக்கைகள் தொடர்பானவை என்றும் ஈரானிய ஊடகங்கள் தெளிவுபடுத்தியுள்ளன.
கெஷ்ம் தீவு மீதான இந்த ஏவுகணைத் தாக்குதல் குறித்த தகவல்கள் முழுமையாக ஈரானிய ஊடகங்களின் அறிக்கைகளை மட்டுமே அடிப்படையாகக் கொண்டவை என்றும், இது தொடர்பில் இதுவரை சுயாதீனமான உறுதிப்படுத்தல்கள் எதுவும் வெளியாகவில்லை என்றும் சுட்டிக்காட்டப்பட்டுள்ளது. தாக்குதலின் பின்னணி, இலக்கு வைக்கப்பட்ட பகுதிகள் மற்றும் ஏற்பட்ட சேதங்கள் தொடர்பான மேலதிக விவரங்களை அதிகாரிகளிடமிருந்து எதிர்பார்க்க முடிகிறது.
