இவ்வாறான சாதனங்களை அணிந்து இசையைக் கேட்டுக்கொண்டு வீதிகளில் செல்வதால், பாதசாரிகள் விபத்துகளுக்கு உள்ளாகும் போக்கு அதிகரித்துள்ளதாகக் குறிப்பிட்ட அவர், இவ்வாறானவர்களுக்கு தற்போது எச்சரிக்கைகள் மட்டுமே விடுக்கப்படுவதாகவும், எதிர்காலத்தில் சட்ட நடவடிக்கைகள் எடுக்கப்படும் என்றும் தெரிவித்தார்.
வீதி விபத்துகளால் நாளொன்றுக்கு 10-க்கும் மேற்பட்டோர் உயிரிழப்பதுடன், 2026-ஆம் ஆண்டு ஜனவரி 01 முதல் ஜூன் 30 வரை இடம்பெற்ற 1,323 வீதி விபத்துகளில் 1,389 பேர் உயிரிழந்துள்ளனர் என்றும் அவர் குறிப்பிட்டார்.
2025-ஆம் ஆண்டுடன் ஒப்பிடுகையில், இந்த ஆண்டு விபத்துகளின் எண்ணிக்கை 105-ஆலும், உயிரிழப்புகளின் எண்ணிக்கை 107-ஆலும் அதிகரித்துள்ளமை மிகுந்த கவலைக்குரியது எனத் தெரிவித்த அவர், இந்த விபத்துகளில் பாதசாரிகளும், மிதிவண்டி ஓட்டுநர்களுமே அதிகளவில் பாதிக்கப்படுவதாகவும் சுட்டிக்காட்டினார். கவனக்குறைவு, அஜாக்கிரதை, வீதி விதிகளை மீறுதல், அதிவேகம் மற்றும் வாகனங்கள் மற்றும் வீதிகளின் முறையற்ற பராமரிப்பு ஆகியவையே இத்தகைய விபத்துகளுக்கு நேரடியாகப் பாதிப்பை ஏற்படுத்துகின்றன என்றார்.
11-வது தேசிய விபத்து தடுப்பு வாரம் ஜூலை 6 முதல் 10 வரை அனுஷ்டிக்கப்படுகின்றது. இதுதொடர்பில், சுகாதார மேம்பாட்டு பணியகத்தில் நடைபெற்ற ஊடகவியலாளர் சந்திப்பின் போதே அவர் இவ்வாறு தெரிவித்தார்.
விபத்துகளைக் குறைப்பதற்காக, பொலிஸ் மா அதிபரின் அறிவுறுத்தலுக்கு அமைய விசேட நடவடிக்கைகளையும் புதிய தொழில்நுட்ப முறைகளையும் இலங்கை பொலிஸ் அறிமுகப்படுத்தியுள்ளது. குறிப்பாக, அதிவேகத்தில் செல்லும் வாகனங்களைக் கண்டறிய, மூன்று கிலோமீட்டர் தூரத்தை மறைக்கக்கூடிய நவீன வேகமானிகளை (Speedometers) அமெரிக்காவிலிருந்து இறக்குமதி செய்து, தற்போது செயல்பாட்டுக்குக் கொண்டு வரப்பட்டுள்ளதாகவும் அவர் தெரிவித்தார்.
சட்டத்தை நடைமுறைப்படுத்தும் போது, எவருடைய அந்தஸ்தையும் பார்ப்பதில்லை என்றும், வீதியில் ஏதேனும் விபத்துகள் ஏற்பட்டால், சம்பந்தப்பட்ட நபர்கள் கண்டிப்பாக நீதிமன்றத்திற்கு உட்படுத்தப்படுவார்கள் என்றும் அவர் வலியுறுத்தினார்.
எதிர்காலத்தில் வீதி விதிகள் கடுமையாக நடைமுறைப்படுத்தப்படுவதுடன், கடுமையான தண்டனைகள் வழங்கப்படுவதோடு, சாரதி அனுமதிப்பத்திரங்களை இரத்து செய்யவும் நடவடிக்கை எடுக்கப்படும். சாரதிகளின் ஒத்துழைப்பு இல்லையெனில், இந்த விபத்துகளைத் தடுப்பதற்கு சட்டத்தைக் கடுமையாக்குவதைத் தவிர வேறு வழியில்லை என்றும் ரணகல தெரிவித்தார். இதற்குச் சமாந்தரமாக, பாடசாலை மாணவர்களை விழிப்புணர்வு செய்வதற்காக ஜனாதிபதி செயலகம், இலங்கை பொலிஸ் மற்றும் கல்வி அமைச்சு இணைந்து ‘டேக் கேர்’ (Take Care) எனும் விசேட வேலைத்திட்டத்தைத் தற்பொழுது ஆரம்பித்துள்ளன.
