இலங்கையில் டெங்கு நோய்த்தாக்கத்தின் வீரியமானது தற்போது ஒரு பாரிய தொற்றுநோய் (Epidemic) மட்டத்திற்கு தீவிரமடைந்துள்ளதாக நிர்வாக சேவைகள், மாகாண சபைகள் மற்றும் உள்ளூராட்சி அமைச்சர் சந்தன அபேரத்ன தெரிவித்துள்ளார்.
நாட்டில் நிலவி வரும் மோசமான மழையுடனான காலநிலை காரணமாக நாடளாவிய ரீதியில் இதுவரை அடையாளம் காணப்பட்டிருந்த 74 டெங்கு அதி-அபாய வலயங்களின் எண்ணிக்கை, தற்போது 84 ஆக உயர்வடைந்துள்ளது.
14 மாவட்டங்களுக்கு அவசர எச்சரிக்கை: பின்வரும் 14 மாவட்டங்களில் டெங்கு நோய் மிக அதிவேகமாகப் பரவி வருவதாக சுகாதார அமைச்சு கடுமையான எச்சரிக்கை விடுத்துள்ளது:
- கொழும்பு, கம்பஹா, களுத்துறை
- காலி, மாத்தறை, அம்பாந்தோட்டை
- குருநாகல், புத்தளம்
- இரத்தினபுரி, கேகாலை
- கண்டி, மாத்தளை
- மட்டக்களப்பு, பதுளை
மாணவர்களுக்கு அதிக ஆபத்து: தற்போதைய சூழ்நிலையில் புதிய டெங்கு வைரஸ் வீரியம் பெற்றுள்ளதால், பாடசாலை மாணவர்கள் இந்த தொற்றுக்கு ஆளாகும் சாத்தியக்கூறுகள் மிகவும் அதிகமாகக் காணப்படுவதாக சுகாதார பிரதி அமைச்சர் ஹன்சக விஜேமுனி சுட்டிக்காட்டியுள்ளார். இதன் காரணமாக, பாடசாலை வளாகங்கள் மற்றும் அதனைச் சுற்றியுள்ள சூழலை உடனடியாக சுத்தமாக வைத்திருக்குமாறு பெற்றோர்களுக்கும் அதிபர்களுக்கும் அவசர அறிவுறுத்தல் விடுக்கப்பட்டுள்ளது.
தேசிய டெங்கு ஒழிப்பு வாரம்: வேகமாக பரவி வரும் இந்த உயிர் அச்சுறுத்தலைக் கட்டுப்படுத்தும் நோக்கில் நேற்று (ஜூன் 15) தேசிய டெங்கு ஒழிப்பு வாரம் அதிகாரப்பூர்வமாக ஆரம்பிக்கப்பட்டது. அதன் இரண்டாம் நாளான இன்றைய தினமும் நாடளாவிய ரீதியில் தீவிர சிரமதானப் பணிகளும், சோதனைகளும் முன்னெடுக்கப்பட்டு வருகின்றமை குறிப்பிடத்தக்கது.
