பொய்யான ஆவணங்களை தயாரித்து ஒரு கடனாளியின் கடன் தொகையை உயர்த்தி, பல மில்லியன் ரூபா அளவிலான மோசடி செய்ததாக கூறப்படும் சம்பவம் தொடர்பாக, கண்டி பகுதியில் உள்ள சம்பத் வங்கி கிளையின் பிரதான நிர்வாக அதிகாரி மற்றும் மேலாளர் உட்பட 9 பணியாளர்கள் கண்டி பொலிஸின் சிறப்பு குற்ற விசாரணைப் பிரிவால் கைது செய்யப்பட்டுள்ளனர்.
இந்த கைது நடவடிக்கை, குறித்த வங்கியிலிருந்து ரூ.35 மில்லியன் கடன் பெற்ற ரஞ்சித் சந்திரசிறி என்ற தொழிலதிபர் அளித்த முறைப்பாட்டின் அடிப்படையில் மேற்கொள்ளப்பட்டுள்ளது.
தான் பெற்ற கடன் தொகையை விட அதிகமான தொகை போலியான ஆவணங்கள் மூலம் தனது பெயரில் பதிவு செய்யப்பட்டு, பல ஆண்டுகளாக இந்த மோசடி நடைபெற்று வந்ததாகவும், இதுகுறித்து வங்கியின் உயர்மட்ட நிர்வாகத்திடம் பலமுறை புகார் அளித்தும் எந்தவித விசாரணையும் நடத்தப்படவில்லை எனவும் தொழிலதிபர் தெரிவித்துள்ளார்.
வங்கி அதிகாரிகள் தயாரித்த ஆவணங்கள் போலியானவை என்பது அரச ஆய்வாளர் (Government Analyst) அறிக்கையின் மூலம் உறுதி செய்யப்பட்ட பின்னர், முறைப்பாடு செய்யப்பட்ட இரண்டு ஆண்டுகளுக்கு பிறகு சந்தேகநபர்கள் கைது செய்யப்பட்டதாக பொலிஸார் தெரிவித்துள்ளனர்.
கண்டி மாவட்ட பொலிஸ் பிரிவு மூத்த பொலிஸ் அத்தியட்சகர் அனுருத்த பண்டார ஹக்மனகேவின் அறிவுறுத்தலின் கீழ், சிறப்பு குற்ற விசாரணைப் பிரிவின் நிலைய பொறுப்பாளர் பிரதான பொலிஸ் பரிசோதகர் ஹேரத் உள்ளிட்ட குழுவினர் மேலதிக விசாரணைகளை மேற்கொண்டு வருகின்றனர்
