உலக சுற்றாடல் தினத்தை முன்னிட்டு, கல்முனை வடக்கு பிரதேச செயலகத்தின் பூரண அனுசரணையுடன், கல்முனை Singer Finance நிறுவனம் மற்றும் இராவணா கழகம் ஆகியன கைகோர்த்து நடாத்திய விசேட மர நடுகை செயற்திட்டம் கல்முனை கடற்கரைப் பகுதியில் மிகச் சிறப்பாக இடம்பெற்றது.
இயற்கையை பாதுகாத்து, எதிர்கால சந்ததியினருக்கு பசுமையான சூழலை கையளிக்கும் உன்னத நோக்கோடு இந்த மர நடுகை விழிப்புணர்வு இயக்கம் முன்னெடுக்கப்பட்டது.
இது குறித்து இராவணா கழகத்தின் பிரதிநிதிகள் கருத்து தெரிவிக்கையில்:
“இன்று நாம் நடுகை செய்துள்ள இந்த மரக்கன்றுகள், வெறும் தாவரங்கள் அல்ல; அவை நாளைய எமது தலைமுறைக்காக நாம் விட்டுச் செல்லும் ஆகச்சிறந்த பசுமைப் பொக்கிஷங்களாகும். சுற்றாடலை தூய்மையாகவும் பசுமையாகவும் பேண வேண்டியது எமது ஒவ்வொருவரினதும் கடமையாகும்,” என குறிப்பிட்டனர்.
கடற்கரை ஓரங்களின் சூழல் சமநிலையைப் பேணவும், நிழல் தரும் மரங்களை உருவாக்கவும் திட்டமிடப்பட்டுள்ள இச்செயற்திட்டத்தில், பிரதேச செயலக அதிகாரிகள், Singer Finance நிறுவன ஊழியர்கள் மற்றும் இராவணா கழக உறுப்பினர்கள் என பலரும் ஆர்வத்துடன் கலந்துகொண்டு மரக்கன்றுகளை நாட்டி வைத்தனர்.
