இலங்கையில் அஸ்வெசும நலன்புரித் திட்டத்தின் கீழ் நிதியுதவி பெற்று வந்த குடும்பங்களில், சுமார் 4 இலட்சத்து 25 ஆயிரம் குடும்பங்கள் ஜூன் 30 முதல் நடைமுறைக்கு வரும் வகையில் அதிரடியாக நீக்கப்பட்டுள்ளதாக கிராமிய அபிவிருத்தி, சமூகப் பாதுகாப்பு மற்றும் சமூக வலுவூட்டல் அமைச்சர் கலாநிதி உபாலி பன்னிலகே தெரிவித்துள்ளார்.
நீக்கத்திற்கான காரணம் என்ன?
கடந்த 2022 ஆம் ஆண்டு நாட்டில் ஏற்பட்ட கடுமையான பொருளாதார நெருக்கடி காரணமாக, தற்காலிகமாக வறுமை நிலைக்குத் தள்ளப்பட்டு ‘விளிம்புநிலை குழுவினர்’ (Vulnerable Group) என வகைப்படுத்தப்பட்ட குடும்பங்களே இவ்வாறு பட்டியலில் இருந்து நீக்கப்பட்டுள்ளனர்.
உண்மையில் இக்குடும்பங்களை கடந்த டிசம்பர் மாதமே நீக்கத் தீர்மானிக்கப்பட்டிருந்தது. எனினும், நாட்டில் ஏற்பட்ட ‘டிட்வா சூறாவளி’ அனர்த்த நிலைமைகளைக் கருத்திற்கொண்டு, மனிதாபிமான அடிப்படையில் மேலும் 6 மாத காலத்திற்கு இவர்களுக்கான நிவாரணம் நீடிக்கப்பட்டிருந்தது. அந்த அவகாசம் ஜூன் 30 உடன் நிறைவடைந்த நிலையிலேயே தற்போது இந்த நீக்கம் அமலாகியுள்ளது.
எஞ்சியுள்ள பயனாளிகள் எவ்வளவு?
ஏற்கனவே இத்திட்டத்தின் கீழ் இருந்த ‘இடைநிலை’ (Transitional Group) பிரிவைச் சேர்ந்த சுமார் 4 இலட்சம் குடும்பங்கள் பட்டியலிலிருந்து நீக்கப்பட்டிருந்தன.
தற்போதைய புதிய நீக்கத்தைத் தொடர்ந்து, இலங்கையில் மிகவும் ஏழ்மையான மற்றும் வறுமைக் கோட்டின் கீழ் உள்ள சுமார் 10 இலட்சம் குடும்பங்கள் மட்டுமே இனி அஸ்வெசும நிவாரணப் பட்டியலில் எஞ்சியிருப்பதாக அமைச்சர் குறிப்பிட்டுள்ளார்.
வழங்கப்படும் உதவித்தொகை விபரம்:
தற்போது தகுதி பெற்றுள்ள எஞ்சிய குடும்பங்களுக்கு பின்வரும் அடிப்படையில் மாதாந்த நிதியுதவி வழங்கப்பட்டு வருகின்றது:
- மிகவும் வறிய குடும்பங்களுக்கு: 17,500 ரூபாய்
- ஏழை குடும்பங்களுக்கு: 10,000 ரூபாய்
