பருத்தித்துறை பகுதியில் பெண்ணொருவரின் தங்கச் சங்கிலியை அறுத்துக்கொண்டு மோட்டார் சைக்கிளில் தப்பியோடிய இரு கொள்ளையர்களை, பொலிஸார் சினிமா பாணியில் துரத்தி மடக்கிப் பிடித்துள்ள சம்பவம் யாழ்ப்பாணத்தில் பெரும் பரபரப்பை ஏற்படுத்தியுள்ளது.
பருத்தித்துறை பகுதியில் பெண் ஒருவர் சென்றுகொண்டிருந்த போது, மோட்டார் சைக்கிளில் வந்த இருவர் திடீரென அவரது ஒரு பவுண் தங்கச் சங்கிலியைப் பறித்துக்கொண்டு மின்னல் வேகத்தில் தப்பிச் சென்றுள்ளனர். எனினும், சாமர்த்தியமாகச் செயற்பட்ட அங்கிருந்த பொதுமக்கள், கொள்ளையர்கள் தப்பிச் சென்ற மோட்டார் சைக்கிளின் இலக்கத்தைக் குறித்துக்கொண்டு உடனடியாக பொலிஸாருக்குத் தகவல் வழங்கியுள்ளனர்.
பொதுமக்களின் தகவலையடுத்து உடனடியாக விழிப்படைந்த பருத்தித்துறை பிராந்திய பொலிஸார், அனைத்து பொலிஸ் நிலையங்களுக்கும் அவசர எச்சரிக்கை விடுத்து தேடுதல் வேட்டையை முடுக்கிவிட்டனர்.
இதனைத் தொடர்ந்து, குறித்த கொள்ளையர்கள் நெல்லியடிப் பகுதி ஊடாக தப்பிச் செல்ல முயன்றபோது, அங்கு தயார் நிலையில் இருந்த நெல்லியடி பொலிஸார் வீதியை மறித்து, சினிமா காட்சிகளை மிஞ்சும் வகையில் இருவரையும் அதிரடியாக மடக்கிப் பிடித்தனர்.
கைது செய்யப்பட்டவர்களிடமிருந்து கொள்ளையடிக்கப்பட்ட ஒரு பவுண் தங்கச் சங்கிலி மீட்கப்பட்டதுடன், வழிப்பறிக்கு அவர்கள் பயன்படுத்திய நவீன ரக மோட்டார் சைக்கிளும் பொலிஸாரால் கைப்பற்றப்பட்டுள்ளது.
கைது செய்யப்பட்ட சந்தேக நபர்கள் இருவரிடமும் மேலதிக விசாரணைகளை மேற்கொள்வதற்காக, அவர்கள் பருத்தித்துறை பொலிஸாரிடம் ஒப்படைக்கப்பட்டுள்ளதாகத் தெரிவிக்கப்படுகிறது. கொள்ளையர்களை உடனடியாகப் பிடிக்க உதவிய பொதுமக்களின் செயலை பலரும் பாராட்டி வருகின்றனர்.
