நீர்கொழும்பு சிறைச்சாலையில் கடந்த 05, 06 ஆம் திகதிகளில் ஏற்பட்ட மோதல்களைத் தொடர்ந்து நிலைமை கட்டுப்படுத்தப்பட்டிருந்த நிலையில், நேற்று (08) மீண்டும் ஒரு சிறிய அளவிலான மோதல் ஏற்பட்டு அமைதியின்மை நிலவியுள்ளது.
சிறைச்சாலைக்குள் நடத்தப்பட்ட ஆய்வுகளின் போது, சில கைதிகள் தங்களது சிறை அறைகளை விட்டு வெளியே வந்து எதிர்ப்பில் ஈடுபட்டுள்ளனர். காவல்துறையினர் தலையிட்டு அவர்களை மீண்டும் அறைகளுக்குள் அனுப்பியபோது, பெண் கைதிகள் குழுவொன்று கடுமையான எதிர்ப்பைக் காட்டி குழப்பம் விளைவித்துள்ளது.
நிலைமை உடனடியாகக் கட்டுப்பாட்டுக்குள் கொண்டு வரப்பட்டதுடன், குழப்பத்தில் ஈடுபட்ட பெண் கைதிகள் குழுவினர் வாரியபொல சிறைச்சாலைக்கு அதிரடியாக இடமாற்றம் செய்யப்பட்டுள்ளனர்.முன்னதாக நடந்த மோதல்களில் உயிரிழந்த கைதிகள் தொடர்பான மரண விசாரணை முடிவுகள் தற்போது ‘திறந்த தீர்ப்பாக’ அறிவிக்கப்பட்டுள்ளன.உயிரிழந்தவர்களில் இந்தியப் பிரஜை ஒருவரும் அடங்குவதாகக் கூறப்படும் நிலையில், அவரது அடையாளம் இதுவரை உறுதிப்படுத்தப்படவில்லை.இது தொடர்பான மரண விசாரணை அறிக்கைகள் இன்றைய தினம் நீர்கொழும்பு நீதிமன்றத்தில் சமர்ப்பிக்கப்படவுள்ளன.
சிறைச்சாலையில் தொடரும் பதற்றமான சூழலை அடுத்து, கைதிகளின் உறவினர்கள் பெருமளவில் நேற்று சிறைச்சாலைக்கு முன்பாக ஒன்று கூடினர். எனினும், பாதுகாப்பு காரணங்களுக்காக அவர்களை அவ்விடத்திலிருந்து கலைந்து செல்லுமாறு சிறைச்சாலை அதிகாரிகளும் காவல்துறையினரும் அறிவுறுத்தினர்.தற்போதைய நிலவரப்படி, நீர்கொழும்பு சிறைச்சாலையில் 700க்கும் மேற்பட்ட கைதிகள் தடுத்து வைக்கப்பட்டுள்ளமை குறிப்பிடத்தக்கது. சிறைச்சாலை வளாகத்தில் பாதுகாப்பு பலப்படுத்தப்பட்டுள்ளது.
