கல்முனை கல்வி வலயத்திற்குட்பட்ட மருதமுனை அல்-மனார் மத்திய கல்லூரியில் புதிதாக நிர்மாணிக்கப்பட்ட “சுபைர் இப்ராஹிம் மாநாட்டு மண்டபம்” அண்மையில் (13.07.2026) உத்தியோகபூர்வமாகத் திறந்து வைக்கப்பட்டது. பாடசாலை அதிபர் ஐ. உபைதுல்லாஹ் தலைமையில் இந்நிகழ்வு மிகச் சிறப்பாக நடைபெற்றது.
அனுசரணையாளருக்குக் கௌரவம்:
நூற்றாண்டைக் கடந்த வரலாற்றுப் பெருமைமிக்க அல்-மனார் மத்திய கல்லூரியின் பழைய மாணவரும், இந்த மாநாட்டு மண்டபத் திட்டத்தின் முழுமையான அனுசரணையாளருமான அல்-ஹாஜ் எம்.ஐ.எம். சுபைர் (Senior Advisor – UNHCR) மற்றும் அவரது துணைவியார் திருமதி முனீரா சுபைர் ஆகியோர் பிரதம அதிதிகளாகக் கலந்துகொண்டு மாநாட்டு மண்டபத்தை நாடாவெட்டித் திறந்து வைத்தனர். பாடசாலைக்கு வழங்கிய இந்த அளப்பரிய பங்களிப்பைப் பாராட்டி, பாடசாலை சமூகத்தினரால் அதிதிகளுக்கு நினைவுச் சின்னங்கள் வழங்கி விசேட கௌரவிப்பும் அளிக்கப்பட்டது.
விடாமுயற்சியே வெற்றியின் ரகசியம்:
இந்நிகழ்வில் மாணவர்களோடு உரையாற்றிய அல்-ஹாஜ் எம்.ஐ.எம். சுபைர், “வாழ்க்கையில் உயர்ந்த நிலையை அடைவதற்குத் தொடர்ச்சியான முயற்சியும் இடையறாத கற்றலும் அவசியமாகும். நமது பின்னணியோ அல்லது வசதி வாய்ப்புகளோ வெற்றியை ஒருபோதும் நிர்ணயிப்பதில்லை. விடாமுயற்சியுடனும், அறிவைப் பெருக்கிக் கொள்ளும் மனப்பாங்குடனும் செயற்பட்டால் எவரும் வாழ்வின் உச்சத்தை அடைய முடியும்” எனத் தனது வாழ்வியல் அனுபவங்களை முன்வைத்து மாணவர்களுக்கு ஊக்கமளித்தார்.
இவ்விழாவில் பிரதி அதிபர்கள், உதவி அதிபர்கள், பகுதி தலைவர்கள், ஆசிரியர்கள், பாடசாலை அபிவிருத்திச் சங்கம் மற்றும் பழைய மாணவர் சங்க உறுப்பினர்கள், பாடசாலை அபிமானிகள், நலன்விரும்பிகள், பெற்றோர்கள் மற்றும் மாணவர்கள் எனப் பெருந்திரளானோர் கலந்துகொண்டனர்.
பாடசாலையின் கல்வி, நிர்வாக மற்றும் இணைப்பாடவிதான செயற்பாடுகளை மேலும் வலுப்படுத்த இப்புதிய மாநாட்டு மண்டபம் எதிர்காலத்தில் பெரும் பங்களிப்பை வழங்கும் எனப் பலராலும் பாராட்டப்பட்டு வருகின்றது.
