அமெரிக்கா மற்றும் ஈரான் படைகளுக்கு இடையே வளைகுடா பகுதியில் போர் பதற்றம் தீவிரமடைந்து வரும் நிலையில், ஜூன் 3 அன்று குவைத் சர்வதேச விமான நிலையத்தின் பயணிகள் முனையம் (Terminal 1) மீது ஈரான் நடத்திய கொடூரமான ஆளில்லா விமானத் தாக்குதல் தொடர்பான அதிகாரப்பூர்வ காணொளிக் காட்சிகளை குவைத் அரசு வெளியிட்டுள்ளது.
இந்தத் தாக்குதலில் இந்தியக் குடிமகன் ஒருவர் துரதிர்ஷ்டவசமாக உயிரிழந்துள்ளார் மற்றும் 63 பேர் படுகாயமடைந்துள்ளனர் என குவைத் சுகாதார அமைச்சகமும் இந்திய வெளியுறவு அமைச்சகமும் உறுதிப்படுத்தியுள்ளன.
ஹோர்முஸ் நீரிணைப் பகுதியில் அமெரிக்கப் படைகள் ஈரானிய எண்ணெய் கப்பல் மற்றும் தகவல் தொடர்பு கோபுரத்தை இலக்கு வைத்ததாகக் கூறி, அதற்குப் பழிவாங்கும் நடவடிக்கையாக ஈரான் இந்தத் தாக்குதலை நடத்தியுள்ளது. குவைத் வான்பரப்பிற்குள் நுழைந்த 30 ஏவுகணைகள் மற்றும் 17 ட்ரோன்களை குவைத் ராணுவம் இடைமறித்து அழித்த போதிலும், சில ட்ரோன்கள் விமான நிலையத்தின் ‘T1’ முனையக் கட்டிடத்தைத் தாக்கியுள்ளன.
தற்போது வெளியிடப்பட்டுள்ள காணொளியில், தாக்குதலுக்குப் பிறகு விமான நிலைய முனையத்தில் கரும்புகை சூழ்ந்திருப்பதும், பயணிகள் மற்றும் விமான நிலைய ஊழியர்கள் அலறியடித்துக் கொண்டு பாதுகாப்பான இடங்களை நோக்கி ஓடுவதும் பதிவாகியுள்ளது. இந்தத் தாக்குதலால் விமான நிலைய உள்கட்டமைப்புகள் கடுமையாகச் சேதமடைந்துள்ளன.
குவைத் பாதுகாப்பு அமைச்சகத்தின் செய்தித் தொடர்பாளர் பிரிகேடியர் ஜெனரல் சவுத் அப்துல்அஜீஸ் அல்-அத்வான், இதனை “ஈரானின் குற்றவியல் ஆக்கிரமிப்பு” என்று கடுமையாகக் கண்டித்துள்ளார். மேலும், குவைத்தில் உள்ள இரண்டு ஈரானிய தூதர்களை உடனடியாக வெளியேற உத்தரவிட்டுள்ளதுடன், தூதரக அதிகாரிகளின் எண்ணிக்கையையும் குவைத் குறைத்துள்ளது.
அப்பாவி பொதுமக்கள் மற்றும் விமான நிலையம் போன்ற பொதுப் பயன்பாட்டு உள்கட்டமைப்புகள் மீது நடத்தப்படும் இத்தகைய தாக்குதல்களை இந்தியா வன்மையாகக் கண்டிப்பதாகத் தெரிவித்துள்ளது. உயிரிழந்த இந்தியரின் குடும்பத்தினருக்கு இரங்கல் தெரிவிக்கப்பட்டுள்ளதுடன், காயமடைந்தவர்களுக்கு இந்தியத் தூதரகம் மூலம் தேவையான உதவிகள் வழங்கப்பட்டு வருகின்றன.
- ceasefire அச்சுறுத்தல்: கடந்த ஏப்ரல் 8 அன்று அமெரிக்கா-ஈரான் இடையே எட்டப்பட்ட தற்காலிக போர்நிறுத்த ஒப்பந்தத்தை இந்தத் தாக்குதல் முற்றிலுமாக கேள்விக்குறியாக்கியுள்ளது.
இச்சம்பவத்தைத் தொடர்ந்து குவைத் சர்வதேச விமான நிலையத்தின் செயல்பாடுகள் தற்காலிகமாக நிறுத்தப்பட்டு, விமானங்கள் மாற்றுப் பாதையில் திருப்பி விடப்பட்டன. பின்னர் பாதுகாப்பு ஏற்பாடுகள் பலப்படுத்தப்பட்டு, முனையம் 4 (Terminal 4) வழியாக குவைத் ஏர்வேஸ் சேவைகள் மெதுவாகத் தொடங்கப்பட்டுள்ளன.
